Føroyska summarið verður kalt

Veðurfrøðingarnir hava í vetur lagt til merkis, at eitt øki í Norðuratlantshavinum, vestanfyri Føroyar, hevur verið sera kalt í vetur, og líkt er ikki til at tað verður stórvegis heitari í bræði.

Tí eru metingarnar, at tað verður kalt um okkara leiðir, men at tað verður heitt yvir einum parti av Skandinavia og eystureftir, men ikki í vestureuropa.

Tað er europeiski veðurstovnurin í Reading í Bretlandi, sum hevur almannakunngjørt eitt kort um dagarnar, sum vísir, hvar vit kunnu rokna við køldum veðri í nakrar mánaðir aftrat.

SÍ EISINI So heitt var tað: Heitasti juli í 81 ár

Eftir kortinum verður kalt á vesturlandinum í Noreg, Bretlandi, Føroyum og Íslandi, og vestaru pørtunum av Fraklandi, Spania og Portugal. Amerikanski veðurstovnurin metir eisini, at tað verður heitt í Norðurnoreg og eystureftir, men kalt í vestureuropa.

Orsøkina kenna veðurfrøðingarnir ikki, men onkur hevur borið fram, at Golfstreymurin viknar. Kanningarnar av Golfstreyminum hava ikki vart leingi, og tí kunna veðurfrøðingarnir seg ikki siga nakað við vissu.

Golfstreymurin hevur alstóran tydning fyri veðurlagið í Norðureuropa, og týski veðurlagsgranskarin, Stefan Rahmstorf, sigur seg ikki ivast í, at Golfstreymurin er viknaður, og tí broytist veðurlagið.

Veðurfrøðingar ikki samdir

Norski veðurlagsgranskarin, Furevik, sigur, at norðmenn ikki hava merkt nakað til at Golfstreymuruin er viknaður fram við norsku strondini. Veðurfrøðingarnir eru ikki samdir.

Summir vísa á, at broytingar altíð henda. Sagt verður, at Norðuratlantshavið gjørdist heitari øll 1990ini, men at sjógvuri er kølnaður aftur síðani í 2010.

Veðurfrøðingarnir vísa á, at havstreymarnir broytast millum 10 og 30 ár, og tað gera teir, hóast globala upphitingin ikki var.