VÍF er føroyameistari

Seinna mansfinalan millum VÍF og H71 endaði sum tann fyrra, VÍF vann við einum máli.

Nógvar spennandi ítróttarupplivingar hava verið í høllini í Vestmanna, men sjáldan - og kanska ongantíð hevur tað kókað sum í dag.

Høllin var á tremur við fólki, og saman við liðunum báðum syrgdu tey fyri, at dysturin bleiv ein uppliving.

Spenningurin helt sær til tað síðsta, men VÍF var omaná við einum máli, og har við eru vestmenningar føroyameistarar.

VÍF vann 24-23. Hálvleiksstøðan var 10-10.

Hetta er fyrstu ferð í tíggju ár, at VÍF er føroyameistari í manshondbólti.

VÍF er eisini greipuvinnari, tí fyrr í ár vunnu vestmenningar steypakappingina.