Frá halli til yvirskot: - Vend má koma í

Hann hevur bert verið nevndarformaður í ein mánað, og vil tí ikki gera stórvegis viðmerkingar til gongdina í almenna partafelagnum. Men hallið skal vendast til avlop, sigur hann.

Seinastu fimm árini hevur almenna partafelagið, Fiskaaling, havt tilsamans 10 milliónir krónur í halli. Bert í fjør var hallið 5,2 milliónir kr., skrivar Vinnuvitan.

Orsøkin, til stóra hallið í fjør, var, at sølan av rognum sveik, sigur nývaldi nevndarformaðurin í felagnum, Kristoffur Laksá. Vinnuvitan skrivar, at bruttovinningurin hjá Fiskaaling er hækkaður á hvørjum ári síðan 2010.

Lønarútreiðslur orsøk til hall

Í 2010 hevði Fiskaaling ein bruttovinning uppá 12 millliónir krónur. Í 2014 var bruttovinningurin komin uppá 15 millliónir krónur, sum svarar til eina hækking uppá 25 prosent í bruttovinninginum eftir fýra árum.

Orsøkin til hallið seinastu árini er lønarkostnaðurin, er lønarkostnaðurin. Frá 2004 til 2009 vóru lønarútreiðslurnar hjá felagnum um 8 millliónir krónur um árið, og tá vóru millum 20 og 25 fólk í starvi.

Tey fingu í miðal 28.500 krónur um mánaðin í løn. Síðani í 2010 eru lønirnar hækkaðar nógv, og í fjør vórðu 17,3 milliónir krónur útgoldnar í lønum.

Eisini fleiri fólk í starvi

Talið á starvsfólki er eisini hækkað nógv, og í 2014 vóru 37 fólk í starvi, og miðal lønin varð hækkað upp í 39.000 kr. um mánaðin.

Í eini uppgerð sum Landsgrannskoðanin gjørdi í fjør, um almennar grunnar feløg, sæst at tørvur hevur verið á at hækka partapeningin í felagnum seinastu árini.

Í 2003 varð ónýttur studningur á 2,5 milliónir kr. lagdur um til partapening, harav 1.459 t.kr. vórðu lagdar í yvirkursgrunn.

Landið læt Lívfiskastøðina

Í 2004 vórðu 2 mió.kr. settar í felagið, tá felagið fekk eina høll við Áir, ið hevði virðið 2 mió.kr. Av hesum vórðu 1,6 mió.kr. lagdar í yvirkursgrunn.

Í 2007 var partapeningurin aftur hækkaður, tá landið læt felagnum Lívfiskastøðina, ið hevði virði á 8,95 milliónir krónur.

24. mai 2009 samtykti Løgtingið at hækka partapeningin í Fiskaaling við fæi, sum var í Endurgjaldsgrunni Alivinnunnar, tí grunnurin varð tikin av. Talan var um umleið 8 mió.kr.

Ætlanin var, at fæið skuldi styrkja fíggjarliga grundarlagið undir Fiskaaling, so størri orka kundi verða sett av til granskingar- og menningarvirksemi innan fiskaaling og biotøkni sum heild í Føroyum.

Væntar at raksturin fer at hanga saman í ár

Løgtingið samtykti eisini, at treytin fyri at hækka partapeningin og fyri árliga studninginum til felagið varð, at P/f Fiskaaling skuldi leggja størri dent á gransking og at felagið, umframt at granska í aling av fiski, eisini skuldi granska í biotøkni.

Kristoffur Laksá, nevndarformaður sigur, at felagið kann ikki halda fram við at hava hall, og sum hann hevur skilt støðuna, so fer raksturin at hanga saman í ár.

Hann sigur, at arbeitt verður við at fáa Fiskaaling aftur á beint, og at arbeitt verður við tí. Hann vil ikki siga nakað um, hvussu tað skal gerast, tí hann hevur bert verið nevndarformaður í felagnum í umleið ein mánað.