Andstøðan fekk neyðugu 17 undirskriftirnar

Andstøðan hevur seinastu dagarnar barst sum úlvur á skóg fyri at sleppa at leggja uppskotið um barnaískoytið fram, hóast freistin er farin.

Og fyri løtu síðani eydnaðist henni at fáa tær báðar seinastu undirskriftirnar, ið restaðu í.

Fólkaflokkurin og Sambandsflokkurin avgjørdu at geva andstøðuni hvør sína - umframt tær báðar, sum Miðflokkurin longu hevði latið.

Formliga hava Rósa Samuelsen úr Sambandsflokkinum og Elsebeth Mercedes Gunnleygsdóttir úr Fólkaflokkinum skrivað undir.

Langt á mál

Men fátækar barnafamiljur hava onga orsøk til at fegnast enn.

Tí langt er á mál, skal uppskotið verða samtykt.

Meirlutin hevur einans givið loyvi til, at uppskotið endar á tingborði. So skal tað viðgerast og síðani í nevnd. Og kemur uppskotið so langt, so skal tað eisini til bæði aðru og triðju viðgerð.