Samgongan vil ikki yvirtaka útlendingaøkið nú

Meirilutin í Uttanlandsnevndini hjá løgtinginum heldur tað ikki vera ráðiligt at samtykkja at yvirtaka útlendingaøkið, áðrenn samráðingarnar hjá landsstýrinum um støðu Føroya í Schengen samstarvinum um marknaeftirlit eru lidnar.

Teir tríggir andstøðuflokkarnir, Tjóðveldi, Framsókn og Sjálvstýrisflokkurin, komu í fjør heyst við uppskoti um at yvirtaka útlendingamál og marknaeftirlit. 

Hálvt ár í nevnd

Og nú hevur uppskotið verið í Uttanlandsnevndini í hálvt ár, síðani 4.november í fjør.

Yvirtøkan er í samgonguskjalinum, men í Sambandsflokkinum er ikki full undirtøka fyri yvirtøkuni.

Nú er Uttanlandsnevndin liðug við uppskotið, og álit verður skrivað og lagt fram mánadagin..

Samgonguumboðini fara at mæla frá at samtykkja uppskotið, so leingi óvissa er um støðu Føroya í Schengen.

Tjóðveldi og Framsókn mæla til at samtykkja uppskotið, men skjóta upp at flyta yvirtøkudagin frá 1.januar í ár til 1.januar næsta ár.