1500 fólk á Bátastevnu

Hetta vikuskiftið er árliga Bátastevnan í Vestmanna.

Nógv ymisk tiltøk eru á skránni, og hóast veðrið ikki hevur verið av tí besta, vóru umleið 1500 fólk til tiltøkini í gjár. Eitt nú vóru X-Factor fólkini Jógvan og Emilie Esther og sungu í Vestmanna í gjár.

Sambært fyriskiparunum er leygardagurin tann best vitjaði dagurin á Bátastevnuni, og tískil vænta teir eisini nógv fólk í kvøld.

Fyrr í dag var skipað fyri felags innsigling av Fútakletti við gamla postbátinum Ólavi fremst. Síðani varð borðreitt við súpan í tjaldinum á keiøkinum, tá bátarnir høvdu lagt at.

Tónleikurin fyllir nógv á Bátastevnuskránni, og fleiri ymiskir tónleikabólkar spæla í kvøld. Shamrock leggur fyri við írskum fólkatónleiki, og síðani verður stóri Bátastevnudansurin í stóra tjaldinum á keiøkinum, har kendi, norski bólkurin Holmsvé og Hans Jacob Hjelm & Vinmenn spæla til dans. Í tí minna tjaldinum, sum í ein ávísan mun er ætla tí yngra ættarliðnum, spæla Grandma´s Basement og Signar í Homrum.