Hammond stillar upp til fólkatingsvalið

Tað er greitt, nú Siumut-flokkurin í gjár kunngjørdi valevnis listan.

Aleqa Hammond legði frá sær sum landsstýrisforkvinna í september í fjør, eftir at tað kom fram, at hon hevði brúkt meira enn 100.000 krónur úr grønlendska landskassanum uppá seg og síni.

Pengarnir eru tó afturgoldnir. Eftir ta gøluna varð nýval til landstingið útskrivað, og tá stillaði Aleqa Hammond ikki upp.

Umframt Alequ Hammond bjóða tríggir aðrir Siumut-politikarar seg fram til Fólkatingsvalið. Hitt grønlendska fólkatingsumboðið, Johan Lund Olsen úr IA, stillar upp aftur.

Johan Lund Olsen tók sæti í fólkatinginum í fjør, tá Sara Olsvig vendi heimaftur til Nuuk at gerast forkvinna í IA.