Útsetta drotningarvitjanin kostað 54.000 krónur

Útvarpið hevur fingið eitt yvirlit frá Løgmansskrivstovuni. 

Í yvirlitinum eru 15 rokningar í sambandi við vitjanina, sum varð av ongum í næst síðstu løtu, tí fólkatingsval var tann 18.juni.

Størsta rokningin, 23.560 kr., er fyri prentlutir. 

Annars eru nógvar rokningar fyri ferðir innanlands og fyrireikingarfundir, ella undanvitjanir í Suðuoynni og Sandoynni.

Ein rokning, 5.000 kr., er fyri oyralokkar. Í yvirlitinum, Útvarpið fekk, stendur ikki, um oyralokkarnir eru ein gáva.

Løgmansskrivstovan hevur einki krav fingið frá kommununum, sum høvdu útreiðslur í sambandi við fínu vitjanina, sum kortini varð av ongum.

Við teimum rokningum, sum higartil eru komnar, kostaði útsetta vitjanin landskassanum 53.682 kr.

Vitjanini í juni varð, sambært almennu boðunum, ikki avlýst. Hon varð útsett.

Løgmansskrivtovan hevur ikki fingið at vita frá danska hoffinum, nær Margreta drotning og Heindrikur prinsur koma til Føroya.

Tey hava verið í Grønlandi nú í tvær vikur. Vitjanina har endar í Nuuk í morgin. 

Seinast, drotningarhjúnini vóru í Føroyum, var á sumri í 2010.