Búskaparráðið: Íløgurnar eru ov stórar

Íløguætlanin, sum landið hevur sett út í kortið fram til 2024, kann hava skaðiliga ávirkan á búskapin. Landið eigur tí at eftirmeta íløguætlanina.

Tað sigur Búskaparráðið í nýggjastu frágreiðingini, sum varð almannakunngjørd fyrrapartin.

Í frágreiðingini setur Búskaparráðið kikaran á íløgurnar hjá landinum, kommununum og so teimum almennu feløgunum, sum t.d. Føroya Tele og SEV. Ráðið hevur kannað íløguætlanina hjá landinum fram til 2024, og hevur samstundis spurt kommunur og áðurnevndu feløg um teirra íløguætlanir fram til 2024.

Og gjøgnumgongdin vísir, at íløgurnar verða stórar fram til umleið 2018-20, og minka so aftur næstu árini.

700 mió. kr. 

Til dømis verða íløgurnar hjá landinum yvir 700 milliónur krónur í 2018, 2019 og 2020. Og síðani minka tær niður í bara 250 milliónir krónur í 2022.

Hetta er ov óstøðugt, metir Búskaparráðið, og ávarar um áttatiárini.

- Vandi er sostatt fyri, at ein slík íløguætlan gerst konjunktur-viðgangandi - á sama hátt sum í áttatiárunum, og í sambandi við seinastu fíggjarkreppuna. Fíggjarpolitisk atlit kunnu neyvan hava verið tikin, tá hendan íløguætlanin er vorðin til, verður sagt.

Samanumtikið verður mælt til, at íløgurnar á landsíløguætlanini verða raðfestar av nýggjum, og eisini “rullandi” endurraðfestar við jøvnum millumbilum, og at tann politiska skipanin, ið skal luttaka í hesi raðfesting, í størst møguligan mun ger sær greitt tey raðfestingarkriteriir, sum rímilig eru at nýta í sambandi við slíka íløguætling, sigur Búskaparráðið.

Øll frágreiðingin frá Búskaparráðnum sæst her

Meiri verður at frætta í útvarpstíðindunum.