Føroyska toskakvotan á Flemish Kap 3.114 tons

NAFO er millumtjóða fiskiveiðifelagsskapur fyri útnyrðingspartin av Norðuratlantshavinum. Í NAFO luttaka Føroyar saman við Grønlandi undir heitinum Danmark vegna Føroyar og Grønland.

Fimm ár eru liðin síðani toskaveiða aftur varð loyvd á Flemish Kap, og stovnurin verður mettur at vera væl fyri. Seinastu kanningarnar hava tó víst eina ávísa niðurgongd í tilgongdini og eitt ov høgt veiðitrýst. Mett verður tí, at farast skal varliga fram við umsitingini av stovninum. Samtykt varð, at heildarkvotan skal verða 13.931 tons bæði í 2016 og 2017. Føroyar eiga 22,35% av heildarkvotuni. Sostatt verður føroyska toskakvotan á Flemish Kap 3.114 tons í 2016 og 2017. Tað eru 31 tons meira enn kvotan í ár.

Umframt toskakvotuna hava Føroyar tvær smáar kvotur av svartkalva og kongafiski. Heildarkvotan fyri svartkalva varð lækkað við 5%. Føroyska kvotan verður sostatt 189 tons. Kongafiskakvotan er 69 tons. Orsakað av vánaligu støðuni í rækjustovninum á Grand Bank verður heldur ongin veiða loyvd komandi ár. Veiðibannið kom í gildi í 2015, og er galdandi bæði í kanadiskum sjóøkið og í altjóða sjógvi. Á fundinum gjørdu Føroyar vart við, at hóast ongin fiskiskapur verður, so mótmæla Føroyar framvegis býtið av rækjum á Grand Bank, t.e. NAFO øki 3L.

Veiðibannið fyri rækjuveiðu á Flemish Kap frá 2011 stendur eisini við.