Kostnaðurin fyri tunlar fyribils ókendur

Ikki fyrr enn tilboðini eru komin, ber til at siga, hvussu nógv Eysturoyartunnilin og Sandoyartunnilin fara at kosta

Eysturoyartunnilin fer væntandi at kosta eina milliard krónur, hevur higartil verið sagt. Eingin neyv kostnaðarmeting er kortini tøk enn fyri teir báðar tunlarnar, P/F Eystur- og Sandoyartunlar skal gera

Høgni Djurhuus

Bjarni Mohr

12.11.2015 - 08:12

Higartil hevur verið sagt, at Eysturoyartunnilin væntandi fer at kosta eina mia. kr. og Sandoyartunnilin 865 mió. kr. P/F Eystur- og Sandoyartunlar upplýsir, at enn er eingin neyv kostnaðarmeting tøk.

Felagið arbeiðir við at útvega fígging og at bjóða út arbeiðið at byggja tunlarnar. Tá tilboðini eru komin, ber til at siga, hvussu nógv tunlarnir fara at kosta.

Henrik Old, landsstýrismaður, svaraði í gjár spurningum frá Heðini Mortensen, løgtingsmanni, um undirsjóvartunlarnar, sum landið skal gera.

Landsverk hevur góðkent fyribils linjuføring

P/F Eystur- og Sandoyartunlar upplýsir, at Landsverk, sum er góðkennandi myndugleikin, hevur prinsippgóðkent fyribils linjuføring.

Eysturoyartunnilin kemur upp norðan fyri Hvítanes. Undir munnanum á Skálafjørðinum verður rundkoyring. Frá rundkoyringini fer so annar tunnilin til Runavíkar og hin til Strendur.

Í lógini um tunlarnar er ásett, at Sandoyartunnilin verður millum Gomlurætt og Traðadal. Tí er endaliga staðfest, at Sandoyartunnilin skal ikki hava samband við Hest, sigur landsstýrismaðurin í samferðslumálum í svari sínum.