G!-tónleikastjórin: "Vit eru sjokkerað av hesum"

Hvat vita tit um syrgiligu hendingina?

"Vit vita bert tað, sum frættist á netinum í løtuni. Har siga tey, at ein tyrluvanlukka hevur verið í Brasilia, og Oliver Tree er ein av teimum deyðu. Vit eru púra sjokkeraði av hesum. 

Tað er lítið at ætla, at hetta er ein stórur skelkur fyri tykkum øll. 

"Hettar er heilt vist ein stórur skelkur. Tað kennist púra óveruligt. Og satt at siga kennist tað løgið, at skula fyrihalda seg til ein so stóran sorgarleik, sum er so feskur enn." 

Umframt at vera ein skelkur, so er hetta eisini ein dyggur smeitur fyri festivalin. Oliver Tree var stóra altjóða høvuðsnavnið á G! í summar. 

"Í løtuni hugsa vit ikki praktiskt. Tíðindini eru júst komin, og tað fyrsta vit hugsa er, at her er talan um ein stóran sorgarleik. Bert 32 ára gamal, er Oliver Tree nú deyður, og eftir sita fleiri sum eiga og syrgja. Okkara hjørtu eru tung, og okkara tankar fara í fyrstu atløgu til tey, sum sita eftir. Hvussu vit reint praktiskt gera við hettar sum festivalur, tað kemur í aðru rekkju beint nú. Tað hyggja vit ikki uppá fyrrenn í komandi viku."

Hvussu takla tit sum festivalur ein sovorðnan sorgarleik? Skulu tit hava eitt navn at avloys? Ber tað til? 

"Vit bíða til í næstu viku við at fyrihalda okkum til hettar reint praktiskt. Eg haldi ikki, at G! Festivalurin hevur verið raktur av júst slíkum umstøðum fyrr, so hettar mugu vit líka finna útav, hvussu mann takklar slíkt. Í dag lurta vit eftir tónleikinum, og mann kann ikki annað enn undrast. Við sangheitum sum "Miss You" og "Life Goes On", kennist tað onkusvegna, sum hann sjálvur hevur gjørt soundtrack'ið til hendan sorgardag. Her er bert eitt at siga í dag, og tað er hendan syrgiliga heilsan, sum ikki sømir seg til nakran ungan persón: Hvíl í friði, góði Oliver Tree."