Uppskotið neyvan samtykt í Løgtinginum

Eitt uppskot frá Anniku Olsen, løgtingskvinnu, um at broyta revsilógina soleiðis, at munur ikki verður gjørdur á, um tú gert teg kynsliga inn á eitt ættleit barn undir 18 ár og eitt biologiskt barn undir 18 ár, verður neyvan samtykt í tinginum.

Rættarnevndin, sum hevur viðgjørt málið, mælir tinginum frá at samtykkja tað. Nevndin sigur, at tá lógarbroytingar verða gjørdar í revsilógini, er vanligt, at revsirættarliga ráðið fær tær til hoyringar.

SÍ EISINI Løgtingskvinna vil hava revsilógina broytta

Í revsirættarliga ráðnum sita fakfólk, og sostatt verða lógarbroytingar viðgjørdar og lýstar gjølla á einum høgum fakligum stigi, áðrenn tær verða framdar.

Løgmaður hevur boðað rættarnevndini frá, at hann arbeiðir við málinum, og miðar eftir at leggja ymsar lógarbroytingar í revsilógini fyri tingið í næstu tingsetu.

Nevndin heldur tí, at tað er rættast at bíða, til løgmaður kemur við broytingunum, og at revsirættarliga ráðið eisini fær møguleika at lýsa málið, áðrenn lógarbroytingarnar verða lagdar fyri tingið. Atkvøtt verður um uppskotið í tinginum í dag.