Føroyanevndin hittir Løkke

Luturin hjá donskum myndugleikum, tá átøk eru móti grindadrápi í Føroyum, verður eisini viðgjørdur á fundinum fyrrapartin í morgin millum Føroyanevndina hjá Fólkatinginum og Lars Løkke Rasmussen, forsætisráðharra.

Søren Thomassen, sjefpolitiinspektørur hjá Ríkispolitinum, fer at hava framløgu um tað málið. Á fundinum verður heimastýrislógin eisini viðgjørd.

Fundurin skuldi vera í 2015

Talan verður um "teknisk gennemgang" sambært dagsskránni fyri fundin í Forsætismálaráðnum í morgin. Útnorðurskrivstovan hjá Forsætismálaráðnum stendur fyri hesari framløguni.

18 av teimum 29 limunum í Føroyanevndini hava boðað frá, at teir fara á fundin í morgin. Fundurin millum Føroyanevndina og forsætismálaráðharran skuldi vera 25. november í fjør.

Men fundurin varð útsettur, tí fólkaatkvøða var í Danmark 3. desember. Føroyanevndin hjá Fólkatinginum hevur sent Forsætismálaráðnum spurningin, hvat danir ætla við Føroyum.

Kunning, ikki samráð

Lars Løkke Rasmussen, forsætisráðharri, játtaði at hitta Føroyanevndina hjá Fólkatinginum. Talan er um kunning, ikki um eitt samráð.

Á fundinum fer forsætisráðharrin at kunna nevndina um, hvørjar ætlanir, danska stjórnin hevur viðvíkjandi sambandinum millum Danmark og Føroyar.

Eftir at Sjúrður Skaale, formaður í Føroyanevndini, hevur sett fundin, fær forsætisráðharrin orðið í eitt korter, og síðani sleppa nevndarlimirnar at spyrja hann í eitt korter.