Fallandi oljuprísurin skakar oljuvinnuna

Sambært Torbjørn Kjus, oljuvinnugreinara, er einki sum bendir á, at gongdin við uppsagnum í norku oljuvinnuni fer at steðga í bræði.

Fyri at fáa gongd aftur á virksemið í oljuvinnuni, heldur greinari at oljuprísurin má tvífaldast - og tað verður ikki enn á sinni.

SÍ EISINI Almennur stuðul skal bjarga arbeiðsplássum

- Tí skulu vit vera vís í, at uppsagnirnar fara at halda fram í 2016, sigur Torbjørn Kjus við norska kringvarpið, NRK.

Tað eru ikki bara starvsfólk í oljuvinnuni, sum mugu svíða fyri lága oljuprísin. Størsta norska oljufelagið, Statoil, misti tilsamans 37 milliardir norskar krónur bara fjórða ársfjórðing í fjør.

Stjórnin vil ikki hjálpa oljuvinnuni

Norski oljumálaráðharrin, Tord Lien, heldur tó, at oljuvinnan sjálv kann gera nakað við trupulleikarnar.

Hann vísir á, at kostnaðarstøði í oljuvinnuni er sera høgt, og tað kann vinnan sjálv leggja í eina nýggja legu fyri at tryggja áhaldandi virksemi í framtíðini.

Norska stjórnin hevur higartil sýtt fyri, at lata almennan stuðul til bløðandi oljuvinnuna, men hevur tó verið noydd at hækka játtanina til arbeiðsloysisstuðul, tí uppsagnirnar hava verið so nógvar.