Ætlanin er góð á pappírinum

Samanleggingin av stóru skúlunum í Havn, Venjingarskúlanum og Kommunuskúlanum, riggar væl á pappírinum, men ikki í veruleikanum

Tað siga Hjørdis Heindriksdóttir og Katrin Gullbein, álitisfólk í Skúlanum á Fløtum, við Skúlablaðið, sum kemur út í dag. Eingin samansjóðing er, tí lærarar eru als ikki saman, men ferðast millum teir mongu bygningar, skúlin heldur til í.

Skúlin á Fløtum er í dag í seks ymiskum bygningum, sum eru spjaddir um allan býin. Onkur lærari undirvísir sama dag í trimum bygningum og skal flyta seg úr einum enda í býnum í hin.

Hava gjørt vart við seg

- Vit hava ikki møguleika at tosa saman, soleiðis at vit verða samansjóðað, siga álitisfólkini Hjørdis Heindriksdóttir og Katrin Gullbein.

Tær halda, at tað var skilaleyst at leggja skúlarnar saman, soleiðis sum hølisviðurskiftini eru. Sambært álitisfólkunum hava nógvir lærarar gjørt vart við seg, men tað eru teir givnir við, tí teir fáa einki svar.

Vanliga góða samskiftið er ikki til longur, og tað gongur út yvir arbeiðsgleðina. Sambært álitisfólkunum umhugsa fleiri lærarar sína støðu í skúlanum, skrivar Skúlablaðið.