IMF: Lønar seg at lata kvinnur stýra

Ert tú misnøgd við inntøkurnar hjá fyritøkuni, er ein løtt loysn at fáa fleiri kvinnur í leiðsluna. Tað er niðurstøðan í stórari kanning, sum Altjóða Gjaldoyragrunnurin, IMF, hevur gjørt.

IMF hevur, sambært Berlingske Business, nágreinað tvær milliónir fyritøkur í 34 evropiskum londum. Niðurstøðan er, at fyritøkur við fleiri kvinnum í ovastu leiðslu og nevnd eru lønsamari.

Granskingarbólkurin kannaði ávirkanina, sum kvinnur í toppleiðsluni hava á inntøkutølini. Í øllum førum geva fyritøkurnar meira, har kvinnur taka avgerðirnar, skrivar nevndin sambært Berlingske.

Lønsemið veksur upp í átta prosent

Ítøkiliga vísir kanningin, at verður ein maður í ovastu leiðsluni skiftur út við eina kvinnu, verður lønsemið hjá fyritøkuni upp í átta prosent betri.

Nógv hevur verið kjakast um sambandið millum inntøku og kvinnur í toppleiðsluni. Granskarar eru fyrr komnir til aðrar niðurstøður enn ta, sum IMF nú kunnger.

Kanningin hjá gjaldoyragrunninum gevur heldur ikki svar uppá, um tað eru kvinnurnar í toppleiðsluni, ið kunnu taka sær æruna av betraða úrslitinum í fyritøkunum, tær starvast í, ella um grundin er, at lønsamar fyritøkur bara duga betur at fáa kvinnuligar toppstjórar.