Eingin stuðul til altjóða kappingar

ÍSF fær onga serstaka játtan at senda føroysk ítróttafólk til altjóða kappingar. Løgtingið hevur felt uppskotið frá Fólkaflokkinum um at marka 1,2 milliónir í játtanini til ÍSF til altjóða luttøku.

Uppskotið fekk bara átta atkvøður, 13 vóru ímóti, og tvær vóru blankar. Samgonguflokkarnir í mentanarnevndini mæltu tinginum frá at samtykkja uppskotið.

Leggja seg ikki út í innanhýsis viðurskifti

Meirilutin metti tað vera skeivt at gera broytingar í stuðulsjáttanini til ÍSF á fíggjarlógini fyri ár. Játtanin til ÍSF er hækkað 2,4 milliónir kr. seinastu trý árini, og meirilutin helt tað ikki vera rætt at leggja seg út í innanhýsis viðurskifti hjá ÍSF.

Minnilutin, Jógvan á Lakjuni, mælti til at samtykkja uppskotið. Minnilutin, Bjørn Kalsø, skeyt upp, at landsstýrið framvegis skal raðfesta játtanina til ÍSF í 2017 og í framtíðini.

Í tí sambandi seta eina hóskandi upphædd av at styrkja altjóða luttøku. Hetta uppskotið fall eisini, 11 vóru fyri og 12 ímóti.