Nú kemur seinna tilmælið

Seinnapartin í dag fær Høgni Hoydal, landsstýrismaður í fiskivinnumálum, seinna tilmælið um fiskidagarnar næsta fiskiár.

Tá fer Fiskidaganevndin at lata sítt tilmæli. Sambært lógini um vinnulígan fiskiskap umboðar Fiskidaganevndin vinnuna á sjónum.

Fiskidaganevndin letur landsstýrismanninum metingar um støðuna í botnfiskastovnunum, tilmæli um fiskidagar, og hvussu fiskiskapurin skal skipast komandi fiskiárið.

Nevndin mannað við umboðum úr vinnuni

Í Fiskidaganevndini eru umboð fyri reiðarar og manningar. Dennis Holm er formaður í Fiskidaganevndini. Seinastu árini hevur Fiskidaganevndin mælt til at halda fram við sama fiskidagatali.

Fyri einari viku síðani kom Havstovan við sínum tilmæli um fiskidagar. Havstovan mælir til stórar skerjingar fyri at verja tosk og hýsu. Á ólavsøku skal Høgni Hoydal so leggja sítt lógaruppskot um fiskidagar fyri Løgtingið.

Fiskiárið byrjar 1. september. Næsta fiskiár verður seinasta heila fiskiárið, áðrenn veiðiloyvini fara úr gildi 1. januar 2018.