Høvdu væntað fleiri inntøkur

Íløgur skulu gerast fyri stívar 200 milliónir krónur meira enn í fjør. Tað hevur Fíggjarmálaráðið fingið burturúr, eftir at hava lisið allar kommunalar fíggjarætlanir fyri 2016.

Í fjør væntaðu kommunurnar 77 milliónir í halli. Men tá árið var liðugt, høvdu tær 159 milliónir í avlopi, hóast raksturin í fjør kostaði nógv meira enn í 2014, tí kommunurnar tóku við heimatænastu og eldrarøkt 1. januar í fjør.

Sambært fíggjarætlanunum hjá kommununum fer tað at kosta eina milliard og 631 milliónir krónur netto at reka tær 30 kommunurnar í ár. Íløgur skulu gerast fyri slakar 600 milliónir krónur.

Kommunurnar vænta at fáa tvær milliardir og 40 milliónir krónur í skatti í ár, 5,3 prosent minni enn í fjør. Eykajáttanir í fíggjarætlanunum hjá kommununum eru ikki við í tølunum hjá Fíggjarmálaráðnum.