Eykajáttanin til Glasir tikin aftur

Grundgevingin er, at meirilutin, tað vil siga samgonguumboðini, hevur endurmett uppskotið frá landsstýrinum, og niðurstøðan er, at umbidna upphæddin upp á átta milliónir krónur ikki skal veitast.

Tað segði Ruth Vang, forkvinna í Fíggjarnevndini, í Løgtinginum seinnapartin, tá hon kom við broytingaruppskoti til eykajáttarnaruppskotið fyri september.

Ikki í samsvar við játtanarlóg

Umsitingin í Løgtinginum er komin við uppriti, har niðurstøðan er, at tað helst ikki er í samsvar við játtanarlógina.

Peningurin skuldi nýtast til fjar- og jarðhitaskipanina hjá Glasi, sum so nógv kjak hevur staðist av.

Tað var andstøðan, ið vildi hava, at pengarnir vórðu tiknir aftur, tí peningurin fór kortini ikki at verða nýttur í ár.