Kappingin herðist kanska

Kappingareftirlitið kunngjørdi í summar eina kanning, sum sigur, at síðani oljufeløgini í Føroyum vórðu seld fyri átta árum síðani, hava tey tikið sær stóran bruttovinning, avkastið hjá teimum er ov stórt.

Ráðið hevur havt nakrar fundir um málið, men eingin avgerð er tikin enn. Tað sigur Heri Joensen, formaður í Kappingarráðnum.

Pláss fyri fleiri

Kappingarráðið heldur, at pláss er fyri fleiri oljufeløgum í Føroyum. Kappingareftirlitið nevnir í sínari frágreiðing í summar, at nýggj feløg kunnu sleppa at brúka tangarnar hjá Magn og Effo.

Kappingarráðið eigur at ansa eftir, at møgulig nýggj oljufeløg kappast á jøvnum føti við tey, sum longu eru.

Kappingaráðið umsitur kappingarlógina, og ráðið skal tryggja virkna kapping í Føroyum. Næsti fundur hjá Kappingarráðnum verður um ein mánað.