Samráðast við MEST

Fiskimálaráðið hevur gjørt av at fara undir samráðingar við skipasmiðjuna MEST um at byggja eitt nýtt havrannsóknarskip.

Tað ger Fiskimálaráðið, hóast ein norsk skipasmiðja hevði nógv lægri tilboð enn MEST.

Norska tilboðið leyk ikki krøvini

Men í eftirkanningini av tilboðunum varð staðfest, at lægsta boðið frá Skipasmiðjuni SIMEK í Noregi ikki leyk spesifikasjónskrøvini.

Samráðingarnar við MEST eru treytaðar av, at Løgtingið er sinnað at hækka játtanina í verklagslógini úr teimum upprunaligu 215 milliónir krónur. Tilboðið frá MEST var 264,1 mió. kr.

Málið hevur verið á landsstýrisfundi, og landsstýrismaðurin í fiskivinnumálum hevur fingið undirtøku fyri at bera uppskot í Løgtingið um at hækka játtanina í verklagslógini.