Nýggj kirkja byggjast á Glyvrum

Nýggj kirkja skal nú byggjast á Glyvrum, og í kvøld hevur Glyvra kirkjuráð almennan kirkjuliðsfund um bygging av nýggjari kirkju

Gamla kirkjan á Glyvrum er frá 1927. Bygt varð upp í kirkjuna í 1981, men hetta eydnaðist ikki so væl. 

Gamla kirkjan er gomul og slitin, og nýggi parturin hevur ikki fingist at rigga, sigur formaðurin í Glyvra kirkjuráði, Hans Jákup Lamhauge.

Ov dýrt at byggja um

Kirkjuráðið, sum sat í 2000, royndi at finna fram til, hvussu hetta kundi bøtast, og hvussu kirkjan kundi samansjóðast betur, so hon gjørdist ein eind.

Niðurstøðan var, at tað bleiv ov dýrt, og kirkjuráðið tók tá støðu til, at tað loysti seg betur at byggja nýtt í staðin.

Gamla kirkjan verður standandi og verður brúkt, til nýggj kirkja er bygd beint við; tá verður gamla kirkjan tikin niður.

Kostar umleið 60 milliónir

Kirkjuráðið skal sjálvt syrgja fyri einum triðingi, ið skal rindast kontant sum eginpeningur, og próvstadømisráðið skal rinda ein triðing.

Vónað hevur verið var, at Mentamálaráðið skal rinda ein triðing, men Hans Jákup Lamhauge dugir ikki at siga, hvussu verður við hesum.

Hans Jákup Lamhauge vónar, at ein nýggj kirkja á Glyvrum kann standa klár um fýra ár, men tað veldst um fígging og onnur viðurskifti, sum skulu fáast upp á pláss, og tað er hetta, sum fundurin fyri kirkjuliðnum í kvøld millum annað skal snúgva seg um.