Nevnd fingið kæru um Høgna Hoydal

Jørgen Niclasen, formaður Fólkafloksins, boðaði frá á tingsins røðarapalli, at hann kærdi Høgna Hoydal.

Men formaðurin í Landsstýrismálanevndini vildi hava kæruna skrivliga eisini.

Fólkaflokkurin kærir um, at Høgni Hoydal, landsstýrismaður, fyrst gav nótaskipunum makrelkvotur. Ein mánað seinni tók hann part av kvotunum í ES-sjógvi aftur.

Tilsøgn kann ikki takast aftur

Fólkaflokkurin sigur, at sambært fyrisitingarrættinum er ein fyrisitingarlig tilsøgn um eitt fiskiloyvi ein bindandi tilsøgn, sum ikki kann takast aftur.

Verður slík tilsøgn kortini tikin aftur, ber til at krevja endurgjald frá landskassanum.

Fólkaflokkurin sigur, at avgerðin hjá Høgna Hoydali er óheimilað, hon skúgvar rættartrygdina til viks og kann koma at kosta landskassanum nógvan pening.