Vilja bøta um heilsustøðuna hjá føroyskum monnum

Jóan Magnus Rasmussen, Fólkaflokkurin, og Bill Justinussen, Miðflokkurin, hava lagt lógaruppskot fram um, at eindir í heilsuverkinum skulu fara út til menn at kanna teirra heilsustøðu, tí menn ikki í nóg stóran mun sjálvir fara til lækna at lata seg kanna.

Teir báðir tingmenninir vísa á, at menn í miðal liva fleiri ár styttri enn kvinnur, og at teir eisini í minni mun enn kvinnur ganga til lækna.

Kann fyribyrgja álvarsamum sjúkum

- Tí kunnu teir ganga við álvarsligum sjúkum uttan at vita tað, siga tingmenninir í viðmerking til lógaruppskotið.

Endamálið við uppskotinum er at skapa betri møguleikar hjá monnum at verða kannaðir og fáa hjálp, áðrenn neyðugt verður at verða innlagdur á sjúkrahús við álvarsamari sjúku, sum kundi verið fyribyrgd ella viðgjørd, áðrenn hon gjørdist álvarsom. 

- Tað kann tykjast løgið, at uppskotið bert vendir sær til menn, men hetta er tí, at tørvurin er størstur hjá monnum, siga tingmenninir hjá Miðflokkinum.