Bíða eftir frágreiðing

Uttanlandsnevndin hjá Løgtinginum vil fyrst hava eina frágreiðing frá landsstýrinum, áðrenn lógaruppskotini verða gjørd.

Uttanlandsnevndin tekur undir við uppskotinum til samtyktar hjá Miðflokkinum um, at Føroyar eru við í teimum tiltøkum, sum ST í 2015 setti sær fyri at fremja fyri 2030.  

Talan er um 17 mál og 169 ávegismál, sum fyrst og fremst skulu beina burtur fátækradømi og steðga hungri.

Landsstýrið skal arbeiða fyri heimsmálum

Heimsmálini, sum tey verða rópt, eru eisini um til dømis heilsu, útbúgving, frið, rættvísi, javnstøðu, orku, reint vatn, ídnað og búskap.   

Miðflokkurin sigur, at landsstýrið eigur at arbeiða fyri, at Føroyar eiga sín part í at røkka heimsmálunum.

Tað halda aðrir flokkar eisini, men Uttanlandsnevndin vil tó fyrst hava eina frágreiðing frá landsstýrinum, áðrenn lógaruppskotini um heimsmálini koma í tingið.