Sirið segði ikki ósatt í tinginum

Sirið Stenberg, landsstýriskvinna, segði ikki ósatt fyri tinginum, tá hon svaraði einum fyrispurningi frá Jógvani á Lakjuni í Fólkaflokkinum um hjúnabandslógina. 

Joen Magnus Rasmussen vísti í fyrispurninginum á, at meirilutin í landsstýrismálanevndini sigur í síni niðurstøðu, at løgmaður hevur verið við til at tulka grein 14, annað stykki, soleiðis, at greinin hevur verið yvirtikin siðani 2017. Og við hesi tulking kunnu vit staðfesta, at Sirið Stenberg, landsstýriskvinna, hevur sagt ósatt fyri tinginum, segði meirilutin í landsstýrismálanevndini í síni niðurstøðu.

Sirið Stenberg svaraði Jógvani á Lakjuni, at hjúnabandsmál er partur av familjurættarliga økinum, sum framvegis er felagsmál. Tí eru tað danskir myndugleikar, sum gera av, hvussu víðari skal farast fram, segði Sirið Stenberg í svarinum.

Men løgmaður heldur ikki, at Sirið Stenberg hevur sagt ósatt fyri tinginum. Hann sigur, at í mai mánaði í fjør var ivasamt, um grein 14, annað stykki, var partur av familjurættinum ella fólkakirkjuøkinum, og Sirið Stenberg svaraði 26. mai í fjør Jógvani á Lakjuni eftir bestu sannføring. Tað er eftir hetta, at Løgmansskrivstovan og danska forsætismálaráðið í felag hava tulkað innihaldið í grein 14, øðrum stykki, at vera yvirtikið saman við fólkakirkjuni á ólavsøku í 2007, sigur Aksel V. Johannesen, løgmaður, í svarinum til Joen Magnus Rasmussen.