Mourinho undir illgruna fyri skattasvik

Hóast fótbóltsstjørnurnar vinna óteljandi milliónir krónur, er nógv, ið bendir á, at tað allíkavæl verður snýtt í skatti. Nú er José Mourinho undir illgruna.

Portugisin var venjari hjá Real Madrid frá 2010 til 2013, og tað er hetta tíðarskeiðið, sum verður kannað.

Ritzau skrivar, at sambært ákæranum er tað hent tvær ferðir, at Mourinho hevur snýtt skattamyndugleikarnar.

Tilsamans er talan um 3,3 milliónir evrur, sum ikki eru skattaðar.

Landsmaðurin hjá José Mourinho, Christiano Ronaldo, sum spælir fyri Real Madrid, er eisini undir ákæru fyri skattasvik.

Sum skilst, skal Ronaldo vitna í málinum 31. juli. FC Barcelona spælarin, Lionel Messi, fekk í fjør 21 mánaðar treytaðan fongsulsdóm fyri skattasvik.