750 milliónir í lønum um mánaðin

Í juli vórðu goldnar 748 milliónir krónur í lønum, og tað eru 50 milliónir meira enn í fjør, vísa tøl hjá Hagstovuni.

Í fjør vórðu goldnar umleið 700 milliónir krónur í lønum hvønn mánað, men síðani september eru tær hækkaðar, og eru nú umleið 750 milliónir um mánaðin.

Størsti vøksturin var um ársskiftið.

Framgongd í øllum bólkum

Framgongd er í øllum høvuðsvinnubólkum.

Tó eru ikki so stórar løngjaldingar í fiski- og alivinnuni nú, sum tær vórðu um ársskiftið.

Í byggivinnuni hevur verið vøkstur úr í eitt síðani 2013, t.e. í fýra ár. 

Í tænastuvinnunum hevur verið javnur vøkstur, men í seinastuni er verulig gongd koma á løbgjaldingarnar í privatu tænastuvinnuni. 

Í løtuni er vøksturin í privatu tænastuvinnunum líka so stórur sum í byggivinnuni, sigur Hagstovan.