Mótmæltu álopinum í Barcelona

Fólk í hundraðtúsundatali gingu í gjár mótmælisgongu í miðbýnum í Barcelona og mótmæltu álopinum, sum hernaðarligir islamistar framdu 17. august. 15 fólk lótu lív.

Í mótmælisgonguni vóru Filip kongur og Mariano Rajoy, forsætisráðharri, saman við borgarum, bjargingarfólki og handilsfólki, ið lupu til at hjálpa teimum, sum fingu skaða í álopinum, tá ein vøruvognur koyrdi á fólk á La Rambla - høvuðsgøtuni í Barcelona.

"Eg eri ikki bangin"

Tey, sum gingu fremst í mótmælisgonguni hildu í ein breiðan dúki, har skrivað stóð: "Eg eri IKKI bangin".

Í mótmælisgonguni vóru eisini nógv katalansk fløgg at síggja, og summi mótmælu at kongurin var við og bóðu hann fara.

Barcelona er høvuðsstaður í Katalonia, og har verður fólkaatkvøða í oktober mánað um sjálvstýri, men myndugleikarnir í Madrid ikki vilja góðkenna fólkaatkvøðuna.

-----