Leigar marghøllina fyri eina millión um árið

Býráðið í Vági hevur samtykt við seks atkvøðum fyri og trimum ímóti, at kommunan skal leiga Marghøllina, sum skal byggjast í Vági, fyri eina millión krónur um árið.

Leigusáttmálin byggir á leigusáttmálan við Páls høll. 

Men lánveitarin hevur nakrar strangari treytir um sáttmálan um Marghøllina enn Páls høll. 

Sleppur at brúka høllina

Við leigusáttmálanum fáa kommunalir stovnar í Vági, ítróttafeløg og onnur loyvi at brúka Marghøllina.

Vágs kommuna letur Marghøllini tvær milliónir krónur í stuðli á fíggjarætlanini í 2017, og 1,5 milliónir krónur afturat í fíggjarætlanini fyri 2018. 

Vágs ítróttarráð byggir Marghøllina, sum kostar 14 milliónir krónur at byggja.

Kommunan byrjar ikki at rinda leigu fyrr enn høllin er liðug.

Fíggjarmálaráðið kannar 

Fíggjarmálaráðið hevur spurt Vágs kommunu um Pálshøll og Vágs ítróttarráð, sum hava fíggjarligt samband við Vágs kommunu. 

Fíggjarmálaráðið vil hava at vita, um talan er um kommunalt virksemi, sum eigur at vera við í roknskapinum hjá kommununi. 

Fíggjarmálaráðið kannar framvegis málið, verður upplýst haðani í dag..