Nú er bátahylurin liðugur

Nýggi bátahylurin á Válinum varð tikin í nýtlsu í gjár. 

Válur er partur av Kvívíkar kommunu, men liggur eystaru megin havnina í Vestmanna.

Higartil hava bara heilt fá bátapláss verið í Kvívíkar kommunu.

Men í nýggja bátahylinum er  pláss fyri 35 bátum. Flestu bátaplássini eru longu umbiðin. 

Talan varð tí um eina stóra hending í Kvívíkar kommunu, skrivar kommunan á heimasíðu síni, og var tað Albin Funn, sum er elsti maður á Válinum, sum skar tráðin til nýggja bátahylin. 

Gamalt arbeiði

Bátahylurin hevur verið leingi ávegis.

Arbeiðið byrjaði longu í 2002.

Men ósemja var millum Kvívíkar kommunu og Vestmanna kommunu um markið millum kommunurnar.

Arbeiðið varð stegðað við fútaforboði.

Rættarmál var síðani um spurningin, har markið millum Kvíkvík og Vestmanna at enda varð staðfest.

Og arbeiðið at gera bátahylin lidnan fór í gongd aftur í vár.