Nú verður verkfallið hert

Frá mikudegnum 3. januar 2018 klokkan átta verður verkfallið hjá pedagogfelagnum hert.

Hesum boðaði Føroya Pedagogfelag frá í gjárkvøldið.

Frá mikumorgninum verður verkfallið hert, soleiðis at verkfallið eisini fer at umfata allar limir hjá felagnum, sum arbeiða í fólkaskúlanum, sernámi og forskúlum hjá kommununum.

Sambært felagnum er manglandi virðing orsøk til herðingina. Felagið heldur ikki, at Fíggjarmálaráðið og Kommunalaarbeiðsgevarafelag hava tikið sáttmálakrøvini hjá Føroya Pedagogfelagi í álvara higartil.

Verkfallið hjá pedagogunum byrjaði 12. desember, tá fóru leiðarar, varaleiðarar og dagrøktarleiðarar í verkfall.

Síðani lýstu arbeiðsgevararnir verkbann, tá stongdu allir dagstovnar, og seinni er verðfallið víðkað til eisini at umfarta bústovnar undir Almannaverkinum, men við teimum undantøkum, sum Almananverkið hevur biðið um, og Pedagogfelagið hevur viljað givið.