Samráð um sild

Á fundinum handaði landsstýrismaðurin Uttanlandsnevndini eitt ráðførsluskriv, hvat hann heldur, at føroyska kvotan av sild skal vera í ár. Hann lat eisini Uttanlandsnevndini eitt upprit og greiddi nevndini frá samráðingunum um norðhavssildina.

Á fundi í desember var greitt, at fiskifrøðingar hjá ICES mæltu til at skerja fiskiskapin eftir sild við 40 prosentum í ár.

Strandarlondini samdust um at skerja fiskiskapin við 33 prosentum niður í 435.000 tons.

Strandalondini eru bara samd um, hvussu nógv av norðhavssild skal fiskast tilsamans í ár - ikki hvussu nógv londini eiga í part. Eingin strandalandaavtala er um norðhavssildina.

Føroyar hava ásett sær sína egnu sildakvotu - Føroyar krevja 19,4 prosent av norðhavssildini.

Um hesin prosent-partur eisini verður galdandi í ár, so verður føroyska kvotan 84.390 tons.

Føroyska kvotan í fjør var 125.000. So útlit eru fyri, at sildakvotan verður umleið 40.000 tons minni í ár.

Høgni Hoydal, landsstýrimaður sigur, at ráðførsluskrivið sum verður handað Uttanlandsnevndini, og viðgerðin í Uttanlandsnevndini er í trúnaði, og tí kann hann einki siga um, hvat mælt verður til.

Men hann ætlar at almannakunngera føroysku sildakvotuna í ár sum skjótast, sigur hann.