Orð broytt í uppskoti um alilóg so eingin ivi er

Orðini skeljar og tari í uppskotinum um nýggja alilóg eru skift út við orðunum onnur djórasløg og plantusløg enn laksur og síl.

Vinnumálaráðið hevur biðið Vinnunevndina um at broyta lógaruppskotið. 

Gamla orðingin kundi skapa iva um, antin loyvt var at ala annað enn skeljar og tara umframt laks og síl.

Fyri at eingin ivi skal vera, vil Vinnumálaráðið hava orðingina broytta. 

Suðuroyggin

Vinnumálaráðið hevur eisini viðgjørt ummæli hjá Heilsufrøðiligu starvsstovuni, sum staðiliga mælir frá, at loyvishavari í Suðuroynni skal søkja um at fáa fiskin kruvdan aðrastaðni. 

Í staðin mælir starvsstovan til, at heimild verður givin í alilógini til at áleggja loyvishavaranum at kryvja fiskin aðrastaðni. 

Vinnumálaráðið metir tó, at tey atlit, sum Heilsufrøðiliga starvsstovan hevur gjørt vart við, eru tryggjað, tí ásett verður í kunngerðini, sum landsstýrismaðurin ger, at almenni myndugleikin kann áleggja kryvjing aðrastaðni í serligum førum.

Hetta kann til dømis gerast, um ov nógv lús er ella sjúkan ILA er staðfest, og virki í Suðuroynni ikki hava nóg stóra orku til at virka nógvan fisk í einum.