Danskir løgreglumenn dømdir fyri mutur

Revsingin er 20 daga treytað fongsulsrevsing fyri at hava brotið revsilógina um passivt mutur.

Býarrætturin í Helsingør hevði frammundan frídømt menninar, sum eru 57 og 64 ára gamlir. 

Málið snýr seg um, at báðir løgreglumenninir høvdu ferðast til Zanzibar, og at partur av útreiðslunum hevði ríkmaðurin, Karsten Ree, rindað fyri teir.

Løgreglufólkini høvdu hitt ríkmannin í sambandi við arbeiði teirra.

Átalan móti Karsten Ree varð slept, men stutt eftir hittu teir Ree, teir gjørdust vinir, og síðani gekk leiðin til Afrika.

Løgreglumenninir góvu ríkmanninum ongar fyrimunir afturfyri gávurnar, leggur dómarin dent á í grundgevingini fyri dómin.

- Men tað er greitt egnað til at minka um álitið hjá fólki á almenna myndugleikan, sigur dómarin.