Flogskipararnir misnøgdir við umstøðurnar

- Arbeiðsgevararnir góðtóku semingsuppskotið, meðan flogskipararnir vrakaðu tað.

Tað sigur Símun Absalonsen, semingsmaður, sum legði eitt nýtt semingsuppskot fyri arbeiðsgevararnar og flogskipararnar hjá Atlantic Airways fyri tveimum døgum síðan.

- Flogskipararnir eru ikki nøgdir við arbeiðsumstøðurnar, sum teir hava. Tað er ikki eins nógv lønin, sum hitt (arbeiðsumstøðurnar, red), sum er trupulleikin, sigur Símun Absalonsen. 

Johan Vágadal, formaður í Flogskiparafelagnum, segði við útvarpið 17. apríl, at flogskipararnir krevja heldur betri arbeiðsumstøður, so sum skipaða frítíð.

Flogskipararnir vrakaðu eisini fyrsta semingsuppskotið, sum varð lagt fyri partarnar 16. apríl.

Partarnir hava 14 daga freist at boða frá arbeiðssteðgi.

Men so leingi sum semingsstovnurin er í málinum, er ikki vanligt at boða frá arbeiðssteðgi, sigur Símun Absalonsen.

Semingsmennirnir hava ikki uppgivið semingsstøðuna enn, sigur Símun Absalonsen.