Øksarmálið byrjar í morgin

Nevningatingið er í sambandi við hendingina 6. mai í fjør, tá ein ungur maður varð álopin við millum annað øks á vegamótinum Íslandsvegur/Landavegur í Havn.

Ákæruvaldið bað fyrr í ár um nýggja mentalkanning av báðum monnunum.

Málið varð seinkað av hesum.

Linda Hesselberg, ákæri, segði tá, at ymsar orsøkir eru til seinkingina, men hon vildi ikki siga hvørjar.

Mentalkanningin hevur stóran týdning, tí m.a. skulu nevningarnir svara, um menninir eru fevndir av grein 16 í revsilógini, sum snýr seg um, um persónur er sálarliga sjúkur nú, ella tá hann framdi gerðina. 

Sambært grein 16 kunnu slíkir persónar sum meginregla ikki verða dømdir í fongsul, men verða dømdir í sálarliga viðgerð. 

Fyrsti fundur í nevningatinginum er í morgin, 6. juni. Tilsamans seks dagar eru settir av í rættinum til nevningatingið.