Grønland skal hava nýtt havrannsóknarskip

Tað eru ikki bara føroyingar, sum skulu hava nýtt havrannsóknarskip.

Fíggjarnevndin hjá grønlendska landstinginum tekur undir við uppskotinum frá landsstýrinum um at játta 200 milliónir krónur til nýtt havrannsóknarskip, skrivar grønlendska kringvarpið.

Nýggja skipið, sum eftir ætlan skal verða liðugt í 2020, skal avloysa 47 ára gamla Pamiut, sum varð lagt í heyst.

Grønlendski Náttúrustovnurin fegnast um at fáa tíðarhóskandi havrannsóknarskip, sum skal vera við til at tryggja vísindaliga grundarlagið undir grønlendska fiskiskapinum.

Ætlanin er at bjóða arbeiðið at smíða skipið út longu í hesum árinum.