Heimafriður stovnaður í kvøld

Í kvøld verður felagið Heimafriður stovnað.

Stovnandi aðalfundur verður í Skótahúsinum í Runavík kl.19.00.

Á skránni verða framløga um ætlanir við felagnum, orðaskifti um ótolandi støðuna í sambandi við ljóð- og luftdálking og nevnd verður vald.

Nýggja felagið skal virka fyri at avmarka ljóðdálking og luftdálking frá skipum, sum sambært stigtakarunum er ótolandi. 

Tey siga, at hóast tey ferð eftir ferð hava gjørt vart við trupulleikan, gera myndugleikarnir einki við hann.

Heilsuskaðiligt

Í skrivi fyrr í ár til Heilsu- og Innlendismálaráðið, siga Lars Fodgaard Møller, landslækni, og Pál Weihe, yvirlækni, at slík ljóðdálking kann vera heilsuskaðilig. 

Og leiðreglur hjá WHO vísa á sterk prógv um, at óljóð er ein av størstu umhvørvisvandunum fyri bæði likamligu og sálarligu heilsuna hjá fólki. 

Tey siga eisini, at 10.desember, í dag, eru liðin 70 ár, síðani aðalfundur Sameindu tjóða samtykti heimsyvirlýsingina um mannarættindi. 

Í hesum sáttmála stendur, at øll hava rætt til hvíld og lívsumstøður, sum tryggja heilsu og vælveru.

Tey, sum fyriskipa felagið Heimafrið og boða til stovnandi aðalfund í kvøld, eru Trina Elttør Eysturoy í Signabø, Sylvia Thomsen í Ánunum, Theodor E. Johannesen í Saltangará og Niels Midjord í Fuglafirði.