Semingsroynd byrjar í morgin

Semingsmenninir høvdu fund við partarnar, hvør sær, seinnapartin í gjár, og tann fundurin endaði við, at partarnir samdust um at fara undir samráðingar fyrrapartin í morgin.

Í dag fyrireika partarnir seg til samráðingarnar í morgin. Reiðarafelagið og manningarfeløgini, Maskinmeistarafelagið, Skipara- og navigatørfelagið og Fiskimannafelagið, byrjaðu at samráðast hálvan februar.

 >> SÍ EISINI Hava útsett ein møguligan arbeiðssteðg

Samráðingarnar slitnaðu seinnapartin hósdagin í farnu viku, tá partarnir gjørdu av at senda boð eftir Semingsstovninum. Samstundis útsettu semingsmenninir ein møguligan arbeiðssteðg frá á miðnátt sunnukvøldið, til á miðnátt næsta sunnukvøld.

Semingsstovnurin fekk tilfar frá pørtunum, og síðani hevur samskifti verið hvønn dag. Terje Sigurðsson, semingsmaður, sigur, at enn er vónleyst at siga, hvat úrslitið kann gerast, men ein semingsroynd verður gjørd, sigur hann.

Hann sigur, at sum er, ber ikki til at siga nakað sum helst um, hvussu samráðingarnar kunnu enda, og hann kann heldur ikki siga nakað um, hvussu leingi samráðst verður, tað verður støða tikin til so hvørt, sigur hann.