Mjølnir er føroyameistari

Mjølnir tryggjaði sær sítt fyrsta føroyameistaraheiti síðan 2004 og harvið eisini greipuna, tá liðið vann 3-1 á Fleyr í seinnu FM-finaluni.

Finalan í høllini á Hálsi var bæði jøvn og spennandi, men tað vóru favorittarnir úr Klaksvík, sum drógu longra stráðið.

Fleyr, sum mátti vinna dystin í dag, byrjaði annars dystin betur og vann fyrsta sett. Síðan kom Mjølnir fyri seg, og hóast lítið og einki var ímillum liðini, tók klaksvíksliðið tey bæði næstu settini.

Í fjórða og avgerandi settinum hevði Fleyr ikki minni enn fimm dystarbóltar, men Mjølnir yvirlivdi, og so kundi Steffan Olsen avgera fyri ovurfegnu norðoyingarnar.

Mjølnir - Fleyr 3-1
27-29
28-26
25-22
28-26