Varakanslarin í Eysturríki lagt frá sær

Varakanslarin í Eysturríki, Heinz-Christian Strache, leggur frá sær.

Tað boðaði hann frá á tíðindafundi fyrrapartin.

Strache er leiðari í Frælsisflokkinum, FPØ, sum er í samgongu við konservativa flokkin hjá Sebastian Kurz, kanslara.

Strache er komin í politiskt ódnarveður, eftir at týskir miðlar í gjár avdúkaðu eina gølu, har varakanslarin er uppií.

Bjóðar almennar sáttmálar

Á videoupptøkum, sum miðlarnir kunngera, bjóðar Strache eftir øllum at døma einum russiskum ríkmanni almennar sáttmálar aftur fyri politiskan stuðul.

Upptøkan vísir, at Strache hevur fund við annan politikara í Frælsisflokkinum og eina kvinnu, sum Reuters sigur lokkaði hann í felluna.

Strache sigur við kvinnuna, sum sigur seg vera í ætt við russiska ríkmannin, at hann kann senda byggisáttmálar víðari til eina fyritøku, um Frælsisflokkurin fær stuðul afturfyri. 

Hann leggur tó dent á, at alt skal fara lógliga fram. 

Kvinnan bjóðar sær til at játta Frælsisflokkinum stórar peningupphæddir, um flokkurin kemur í stjórn. 

Vita hvør keldan er

Upptøkan skal verða gjørd á sponsku frítíðaroynni Ibiza í juli í 2017, fáar mánaðir fyri valið, sum endaði við, at konservtivi flokkurin og Frælsisflokkurin skipaðu samgongu.

Keldan, sum hevur latið týsku miðlunum videoupptøkurnar, vil vera ónevnd, men Der Spiegel og blaðið Su:ddeutsche vita, hvør keldan er.

Flutningsmálaráðharrin, Norbert Hofer, verður nýggjur varakanslari í eysturríksku stjórnini.