Ebbu-virðislønin latin fyri aðru ferð

Rithøvundafelag Føroya letur virðislønina. Virðislønin er uppkallað eftir Ebbu Hentze, sum doyði 20. mai í 2015.

Virðislønin, sum er 25.000 krónur, verður latin ungum rithøvunda, sum hevur sýnt serligar gávur. 

Í fjør varð fyrsta Ebbu-virðislønin latin Beini Bergsson fyri yrkingasavnið "Tann lítli drongurin og beinagrindin."

Testamenti

Ebba Hentze skrivaði í sínum testamenti at “Eftir mín deyð skal Listasavn Føroya arva málningar og onnur myndlistaverk, sum eftir meg eru. 

Annað, sum er eftir meg, herundir pengar, bøkur og allar aðrar ognir, skal Rithøvundafelag Føroya arva at nýta til stuðul til ungar rithøvundar, ið hava sýnt serligar gávur. 

Somuleiðis skal Rithøvundafelag Føroya til sama endamál arva øll rættindi míni sum rithøvundur, herundir framtíðar inntøkur frá danska bókasavnsgrunninum.” 

Við hesum í huga setti nevndin í Rithøvundafelagnum 26. november 2017 á stovn Ebbu-virðislønina við at seta góðar  570.000 krónur á kontu.