Sendir fólk til Føroya at kanna matvørur

Føroysk virki kunnu seinni í ár selja fisk til Brasil.

Brasilski matvørumyndugleikin MAPA kemur til Føroya á eftirlitsvitjan í heyst.

Endamálið er at góðkenna Heilsufrøðiligu starvsstovuna sum skikkaðan eftirlitsmyndugleika í Føroyum.

Brasilska vitjanin í Føroyum varir tíggju arbeiðsdagar. 

Tvey eftirlitsfólk frá MAPA vitja og kanna Heilsufrøðiligu starvsstovuna, og saman við umboðum frá Heilsufrøðiligu starvsstovuni verður farið á eftirlitsvitjan á tíggju fiskavirkjum og alivirkjum, á verksmiðjuskipum og alibrúkum.

Á eftirlitsvitjanini í heyst skulu brasilsku myndugleikarnir kanna og góðkenna føroyska matvøruframleiðslu og eftirlitið hjá Heilsufrøðiligu starvsstovuni, við tí fyri eyga at fáa regluligan føroyskan útflutning til Brasil í lag. 

Avgerð verður tikin um, hvar MAPA og HFS fara á eftirlitsvitjan, tá freistin um tilmelding til brasilska listan er farin, og greitt er, hvørji virki hava ætlanir um at útflyta matvørur til Brasil.

Freistin at boða frá er til týsdagin 18.juni.