KÍ og NSÍ bjóða av í Evropa í kvøld

Í dag byrjar innleiðandi umfari í Evropa League, har Føroyar hava trý feløg, B36,NSÍ og KÍ, við.

KÍ og NSÍ skulu bæði spæla í kvøld.

Klaksvíkingar taka ímóti Tre Fiori úr San Marino á ovara vølli í Gundadali. Dysturin byrjar klokkan 19.00.

Sambært altjóða veddingarfyritøkum er KÍ í tí óvanligu støðu undan einum evropeiskum dysti, at teir eru stórfavorittur.

Útvarpið sigur beinleiðis frá dystinum ímillum KÍ og Tre Fiori.

NSÍ skal royna seg í Norðurírlandi, har Ballymena United tekur ímóti teimum. Í hesum dystinum verður norðurírska liðið mett at vera favorittur av vinna.

Ballymena United og NSÍ spæla klokkan 19.45 í kvøld.

B36 er triðja felagið í kappingini, teir eru styrkismettir til næsta umfar, har teir møta Crusaders FC úr Norðurírlandi. Fyrri dysturin teirra millum verður spældur í Belfast 11.juli.