Loyvi til ikki at seta mann í leiðarastarv

Kvinnuhúsið søkti um undantaksloyvi 31. mai, og Javnstøðunevndin var samd um at geva undantaksloyvi, sigur Ólavur Ellefsen, formaður í Javnstøðunevndini. Tað kann nevndin gera sambært javnstøðulógini.

Í lógini stendur, at ikki er loyvt at lýsa eftir fólki til arbeiðis, har tað á nakran hátt bendir á, at annað kynið hevur fyrimun, uttan so at starvið er treytaleyst kynsbundið. 

Serligt høvi

Men so stendur eisini, at í heilt serligum føri kann Javnstøðunevndin geva undantaksloyvi. Og leiðarin í Kvinnuhúsinum er eitt heilt serligt føri, heldur Javnstøðunevndin. 

Kvinnuhúsið søkir eftir persóni til leiðarastarvið. Men ikki fyrr enn førleikarnir hjá umsøkjarum verða nevndir, kemur undan kavi, at søkt verður eftir kvinnu.

Har stendur, at umsøkjarin dugir at vera rólig í truplum støðum. Hetta er einasta ábending í lýsingini um, at søkt verður eftir kvinnu.