Neyðtøkumál á G! meldað til løgregluna

- Málið verður kannað í løtuni, og so verður støða tikin til, um tað kemur fyri rættin.

Tað eru boðini frá vakthavandi á politistøðini, tá spurt verður um fráboðanina um kynsligan ágang móti einari ungari kvinnu í Gøtu seinnapartin sunnudagin.

Hendingini fór sambært www.in.fo fram á einum kampingøki, sum varð brúkt í sambandi við G! festivalin. Løgreglan fór alt fyri eitt á staðið og handtók nakrar mans í tjúgunum.

Okurt bendir á, at menninir eru latnir leysir aftur, tí eingin fráboðan um grundlógvaravhoyring er send út.

Vakthavandi á politistøðini vil tó ikki vátta, at menninir eru latnir leysir, men sagt verður, at støða enn ikki er tikin til, um málið kemur fyri rættin. Mett verður um hetta í løtuni.

Annars vil politiið ikki siga so nógv um málið.