Viðareiðistunnil: Lægsta tilboð 13 mió. kr. hægri enn játtanin

Antin noyðist Landsverk at samráða seg niðureftir, ella noyðist landsstýrið í løgtingið at biðja um fleiri pengar. Nú tilboðini eru latin upp, er lægsta tilboðið upp á arbeiðið at gera berghol til Viðareiðis 175 mió. kr.

Tað eru 13 milliónir meira, enn løgtingið í vár játtaði til arbeiðið. Sambært lógini kann verkætlanin í mesta lagi kosta 162 mió. kr.

Og verkætlanin er:

- eitt 1850 metrar langt berghol millum Hvannasund og Miðdal,

-vegur úr landsvegnum við Hvannasund til bergholdsmunnan

- og landsvegur úr Miðdali til Viðareiðis.

Føroyska byggifelagið Articon og norska felagið LNS eiga lægsta tilboðið. Landsverk fekk tilboð frá fýra byggifeløgum. Hini tilboðini eru nakað væl hægri enn tilboðið frá Articon og LNS.